03.03.12.
ჰედლაინი
=არის თუ არა პრეზიდენტი ჩანაცვლებადი?
=ამიერიდან პრეზიდენტს ვეღარავინ შეუშლის ხელს, თოვლის პაპა რომ ჯიბეში ჩაისვას.
=ლიბერტარიანელი ბენდუქიძის ეკონომიკური სტრატეგია და ლენინის ანდერძი.
=გარემოს დაცვის მინისტრის ბოდვითი ინტერპრეტაცია ფსიქიატრის კომენტარს საჭიროებს.
=რუსეთის მმართველი ხროვის პროპაგანდისტული მანქანა თუმც ჟანგს შეუჭამია, მაინც განაგრძობს რახრახს.
="მეოცნებეების" PR-ინვალიდობის მკურნალობას ნაცადი კადრი შეეცდება.
=საქართველოში ყველა ხელისუფლება და „ხელისუფლების შიგნით ყველა ადამიანი ჩანაცვლებადია“, განაცხადა პრეზიდენტმა სააკაშვილმა 2 მარტს და დასძინა, რომ „საერთოდ, ადამიანებს ყველა სახე რაღაც პერიოდის შემდეგ ბეზრდება“. >>> სამწუხაროდ, აზრობრივად გამართულ ფრაზას კონკრეტული შინაარსი ისევე დააკლდა, როგორც, ვთქვათ, ხეიბარს შეიძლება აკლდეს ხელი, ან ფეხი - ორატორმა არ დააზუსტა, "ყველა ადამიანში" მოიაზრებს თუ არა საკუთარ პერსონას, ანუ რამდენად ჩანაცვლებადია თვითონ, მიხეილ ნ. სააკაშვილი, რომელიც, ყველა ნიშნის მიხედვით, "ხელისუფლების შიგნით" მოღვაწეობს.
=სახელმწიფო საკუთრებაში არსებული უძრავი ქონების პირდაპირი მიყიდვის ფორმით პრივატიზებისას, მყიდველის მიერ საფასურის გადახდის ვადის განსაზღვრისას, პრეზიდენტი შეზღუდული აღარ იქნება.
შესაბამისი ცვლილება პარლამენტმა პლენარულ სხდომაზე სახელმწიფო ქონების შესახებ კანონში მესამე მოსმენით, საბოლოოდ დაამტკიცა. >>>
ანუ: პრეზიდენტს აქამდე შეეძლო ნებისმიერი სახელმწიფო ქონება ნებისმიერი კომპანიისთვის თავისი ნებისებრ, აუქციონის გვერდის ავლით მიეყიდა, მაგრამ ვალდებული იყო, მყიდველისგან ფულის ამოღება 1-5 წელიწადში უზრუნველეყო. ამიერიდან ფულის ამოღების ვადა შეუზღუდავია. ამრიგად: პრეზიდენტს შეუძლია, გაყიდოს ნებისმიერი სახელმწიფო ქონება, ხოლო ფულის ამოღება განუსაზღვრელი ვადით გადადოს. ანუ - პრაქტიკულად - რაც უნდა, ის გააჩუქოს და ვისაც უნდა, იმას აჩუქოს.
=ბუნებრივი რესურსების სააგენტომ ქვემო ქართლის რეგიონში ოქროს, სპილენძის და ბარიტის მოპოვების ლიცენზია 29 თებერვალს 110.5 მილიონ ლარად გაყიდა, განაცხადა ენერგეტიკის და ბუნებრივი რესურსების სამინისტროსთან არსებულმა სააგენტომ.27–წლიანი ლიცენზია კომპანია Mining Investments LLC–მ მოიპოვა, რომელიც აუქციონის ერთადერთი მონაწილე იყო.
კომპანია საქართველოში 2012 წ. 13 თებერვალს დარეგისტრირდა – მას მერე, რაც ბუნებრივი რესურსების სააგენტომ 19 იანვარს წიაღისეულის მოპოვების ლიცენზია აუქციონზე გაიტანა. Mining Investments LLC –ის 100%-იანი წილის მფლობელი არვიდას ბრუსოკასია, ლიტვის მოქა-ლაქე, რომელიც სანკტ–პეტერბურგში ცხოვრობს.
ლიცენზია მოიცავს ბოლნისის და დმანისის რ-ში მდებარე ოქროს, ბარიტის და სპილენძის საბადოებს. ტერიტორიის საერთო ფართი 1 200 ჰექტარს აღემატება. >>> ბენდუქიძე "ხელისუფლების შიგნით" აღარაა, მაგრამ მისი დანატოვარი ეკონომიკური სტრატეგია ისევე წარმატებით ცოცხლობს, როგორც თავის დროზე - ლენინის ანდერძი.
=თბილისში, კიკვიძის ბაღში პოლიციის შენობის მშენებლობის გამო ხეების გაჩეხვას საქართველოს გარემოს დაცვის მინისტრი სოციალურ ქსელ Facebook-ით ეხმაურება და აცხადებს, რომ ამ ტერიტორიაზე პოლიციის აშენების შემდეგ ბაღი უფრო დასუფთავდება და მოწესრიგდება.
,,დარწმუნებული ვარ, კიკვიძის ბაღში, მას შემდეგ რაც მიმდებარე ტერიტორიაზე პოლიციის შენობა აშენდება, იქაურობა დალაგდება, დასუფთავდება, მოწესრიგდება და განათდება, გაცილებით მეტი ხალხი ივლის უსაფრთხოდ, დაისვენებს და სიამოვნებას მიიღებს, ვიდრე ეს როდესმე ხდებოდა”, - აცხადებს მინისტრი და დასძენს : ,,ხე, თუ ის განსაკუთრებულ ბუნებრივ, კულტურულ ან ისტორიულ ღირებულებას არ წარმოადგენს, შეიძლება მოიჭრას”. >>>
ზემოთქმულის ლოგიკიდან გამომდინარე, ნებისმიერ ტერიტორიაზე, სადაც საშურია "სისუფთავე, წესრიგი და განათება" პოლიციის თითო კანტორა უნდა აშენდეს. ასეთი ლოგიკა კომენტატორად უთუოდ ფსიქიატრს საჭიროებს.
=რუსეთის საგარეო საქმეთა სამინისტრო საქართველოს დიპლომატიური ურთიერთობის აღდგენას სთავაზობს, რის შემდეგაც საზღვარზე ორმხრივი უვიზო რეჟიმის დამყარებაზეც ყაბულს იქნება. >>> ამ "შემოთავაზების" დახასიათებას, ალბათ, ჩინებულად წაადგება აწ განსვენებული იმპერიის მამის, ამხ. სტალინის სიტყვები, რომლითაც მან "პრავდის" რედაქტორყოფილ ლევ ზ. მეხლისს მიმართა: "თქვენი პოზიცია ძალიან მოხერხებულია, მაგრამ მთლიანად დამპალია".
=ტელეკომპანია ,,მე-9 არხის” გენერალურ დირექტორად კახა ბექაური დაინიშნა. ტელეკომპანიის 100-პროცენტიანი წილის მესაკუთრე ბიძინა ივანიშვილის მეუღლის, ეკატერინა ხვედელიძის კომპანია შპს „აქცეპტია“. >>>
"მეოცნებეების" არც ერთ PR-აქციას აქამდე პროფე-სიონალთა გუნდის არა თუ ხელი, თითიც არ დასტყობია. პოლიტიკური თვითშემოქმედების ადეპტებმა, როგორც ჩანს, კეფა მოიქექეს და ბ-ნ ბექაურს უხმეს. ამ უკანასკნელს ტვ მენეჯმენტის საკმაო გამოცდილება აქვს.
=აფხაზი სეპარატისტები აფხაზეთის ქალაქების ქართული ტოპონიმებით წარმოთქმის წინააღმდეგ ბრძოლას იწყებენ. როგორც ჟურნალისტებს აფხაზეთის ე.წ. საგარეო საქმეთა მინისტრმა, ვიაჩესლავ ჩირიკბამ განუცხადა, “ოფიციალურმა სოხუმმა” ყველა საერთაშორისო ორგა-ნიზაციას მისწერა და შეატყობინა, რომ აფხაზეთი არ აპირებს იმ მესიჯების განხილვას, სადაც აფხაზური ქალაქები არასწორი დასახელებითაა მოხსენიებული. ჩირიკბა მოითხოვს, რომ საერთაშორისო ორგანიზაციებმა წერისას სოხუმის ნაცვლად “სუხუმ”, ხოლო გალის ნაცვლად “გალ” გამოიყენონ. >>> ჩირიკბას კბენა ქართველთა ტრაგიკულ ჩიტირეკიობას უნდა დაბრალდეს და არა აფსუების ცოფის სინდრომს.
=ოფიციალური თბილისის ძალისხმევა, რომელიც მიმართულია საქართველოსათვის იერუსალიმის ჯვრის მონასტრის დაბრუნებისკენ, ბევრ კითხვას ბადებს. შეგახსნებთ, რომ პირველად იერუსალიმის ჯვრის მონასტრის საქართველოსთვის დაბრუნების შესახებ დაწყებულ მოლაპარაკებებზე საქართველოს პრეზი-დენტმა 25 თებერვალს განაცხადა. ისრაელის საგარეო საქმეთა სამინისტროში გაკვირვებულები არიან ქართული მხარის განცხადებების გამო, რადგან მათ წარმოდგენა არ აქვთ, თუ რა მოლაპარაკებებზეა საუბარი.
თავის მხრივ, იერუსალიმის საპატრიარქოს ბერძნული მართლმადიდებლური ეკლესიის წარმომადგენლი ეპისკო-პოსი არისტარხუსი არ მალავს თავის გაკვირვებას აღნიშნულ თემაზე საქართველოს ოფიციალური პირების მიერ გაკეთებული განცხადებების გამო. მისი თქმით, ჯვრის მონასტერი თითქმის 330 წელია ისერუსალიმის საპა-ტრიარქოს ბერძნულ მართლმადიდებლურ ეკლესიას ეკუთვ-ნის და მას საპატრიარქო აკონტროლებს.
საქართველოს საპატრიარქომ 28 თებერვალს გაავრცელა განცხადება, რომელშიც ნათქვამია, რომ იერუსალიმის ჯვრის მონასტრის საქართველოსთვის დაბრუნების შესახებ მოლაპარაკებების არსებობაზე მათ მასობრივი ინფორმაციის საშუალებებიდან გაიგეს. >>>